Tag 75 bis 82 (11.6-18.6.21 Doninos (Ferrol) / Praia de Santa Comba / Valdovino /Loiba (Ortigueira)

nach em morgentliche surfe am praia doninos und em z`morge derna ufem parkplatz simmer nomal richtig ferrol in negste supermecado ois mit läbesmittel i decke und den ischs nomal zrugg nach doninos gange, wo mer oise admiral uf de klippe mit blick ufs meer und und de praia parkt händ. de wecker isch dii negste zwei täg immer bezitte gstellt worde so das mer na mit de frühä morgesunne het chöne is meer use padlä. für mich als morgemuffel bruchts den hald amig chli a laufziit aber die glitzernde und wärmende sunnestrahle mached alles me als erträglich und dank em chalte wasser im gsicht isch mer den au schneller wach als eim zum teil lieb wär.(:

nach warme aber mega windige zwei täg isches am sunntig den zwei buchte wiiter an praia santa comba. au da hemmer wiider es super schöns plätzli ufere wiise am meer gfunde. surfe isch aber da leider nöd so a gseit gsi und da mir ja nöd fuuhl sind hät min ängel e glorrichii idee gha, anstatt mal usschlafe chamer ja eifach morge sport mache... nei nöd chli schmusä und sexlä wücki richtigi körperlichi betätigung.... so hämer das hald a packt, aso de marco öpe wie es duracell-häsli und ich wie e eidächsä wo na i de winterstarri isch. aber muss säge au das duät guät und mer cha sich fast bitz dra gwöhne.

nach somene stränge morge hemer ois den aber doch na en tag am beach gönnt mit chli relaxe, läse, sudoku und chli strand uf und strand ab gwagglä.

sisch en spezielle ort gsi, swetter het so schnell gwechslet i de stimmig das fascht chli unheimlich gwürkt het. vo strahlend blau, bis tüüf schwarze gwitter himmel und den wiider sunne schii und paar minute spöter simer wiider i zuckerwatte dickem nebel verschwunde.

de küste na ufwerts isch de negsti halt in valdovino gsi, det hämer en chliine campingplatz a gstühret zum batterii lade und stinki chleider wäsche und will so starke räge und wind a gseit gsi isch hemer denkt feste undergrund schadet em schwäre und überladne admiral au nöd. es super plätzli, nebst ois hets nur öpe 2-3 anderi gest gha und mer hend de totali friide gha und direkte meersicht. s wetter het na zwei täg möge troche blibe und so händ mir nach em morge sport oisi brätter packt und sind wiider ab is chalte nass. doch so wücki oisem niveau händ d`welle nöd entsprochä... de marco het sich den doch chli chöne dur d`welle use tauche aber ich bi nöd ma zum wiiswasser us cho will die eifach schlag uf schlag uf eim i prassled sind. egal fun hämer gha. (:

am tag druff isch den de räge cho und wie er cho isch nacheme spaziergang is dorf uä simmer me als seichnass gsi und so hämer mal wiider oisi heizig chöne tschäderä la und es fäscht im admiral fiirä.(: es het abelah was het möge und i de nacht sind den au na ganz verruckti sturmböhene ufcho, soo das ois soo richtig durregschüttlet hät und mir e mitternacht aktion händ müsse startä zum oisäs sägel ii rolle, sust wered mer na devo g`flogä. (: naja isch ja echt schön wiider mal chli räge, de admiral glänzt und mer gseht wiider zu de fänster us nur das alles so seichnass muss sii isch e bitzeli grüslig.

da hilft jez au nüt und so hämer alles zämä packt und sind paar kilometer wiiter düsed. da in loiba (ortigueira) stömer jez innere chline liechtig im piniiewald. es jungs päärli het da e chlini bar wos mega feini pizzas mached und die liechtig chli frei ruumet für so fagabune wie mir wo uf de durchreis sind. sisch mega schön und mit dem viile grüän zringelum und de füähchtikeit wo us de wisse mit fahrn stiigd isches es mega schöns feeling.