Tag 155 bis 160 (30.8.-4.9.21 S. Hubert / Bizory / Herbeumont / Insenborn / Clervaux)

mit räge, wulche und näbel het de morge gstartet. nacheme usgibige z`morge hät sich de näbel verzoge und d`sunne hät teils möge dur d`wulchedecki dur truckä, was am wald e super schöni stimmig verpasst hät. d`sunne hät ois denn auf de fahrt richtig bastogne begleitet. chli usserhalb vo de stadt selber sind mer nach bizory cho. es chlises dörfli mit sehr viil wald zringelum. det häts ois denn au ane zoge. ufeme chiisparkplätli im wald händ mer parkt und sind chli dur d`wälder gschliche. sisch en waldabschnitt wo im 1. wie au im 2. wältchrieg e wichtigi rolle gspiilt het. dii bekannte foxholes (schütegräbe / kriegsdoku band of brothers/ easy company / 101 st. airborne div.) sind teils na sichtbar aber hauptsächlich het sich d`natur nach guät 80 jahr scho zimmli alles wiider zrugg ghollt. doch ischs es speziells gfühl gsii det de dur schliiche. leider hets den am spötere namittag wiider mal möge seiche wie verruckt und soo händ mir ois den im langsam durchnässte admiral chli zrugg zogä.

am morge druff isch e superschöni herbstimmig gsi und d`sunne het möge druckä wie verruckt. oise negsti halt isch bastogne sälber gsi. det simmer is airborne museum gangä und das isch echt iidrücklich und super guät gmacht gsi. nach guät 2 stund hemmers den aber gseh und sind nach herbeumont wiiters. das isch e ortschaft wo am fluss semois liit, chli oberhalb vo bouillon vo wo us mir letschmal de kayak-tripp gstartet händ.

da s`wätter für dii negstä täg sett warm und schön werde hend mer denkt mer stüred es campingplätzli a. sisch rächt en spezielle und bitz herunterkommne platz gsi, halb so wild will mer hend e tolls plätzli für ois gha wo mer hend chöne führä und sii. soo händ mir die zwei täg det verbracht mit chli sunne gnüsse, dur d`wälder zieh zum führholz suächä und`s eifach gnüssä. am morge und am abig sind jewils 1 bis 2 iisvögeli cho und hend wie wild fischgfange, sind de fluss uf und ab gflizt und händ teils dirket vor ois ufeme stei rast gmacht, das isch sooo wunderschön gsi zum gseh.

leider gönd die täg soo schnell verbii und sisch scho baldbald wiider as heicho z`dänkä. drum lönd mer belgie hinder ois und ziend wiiter nach luxemburg. de ersti stopp in luxemburg isch d`ortschaft insenborn, das liit amne grosse fluss (sauer). ufeme parkplatz im grüäne mit eme mega usblick uf d`sauer, de gross staudamm und uf wälder händ mir en wunderschön kitschige sunneuntergang gseh und d`nacht verbracht.

mit de sunnestrahle im gsicht ufstah isch härrlich und so sind mer zfriidä los tückerlet bis mer in esch sauer a cho sind. det hets en spazottel über e grossi staumuur gäh bis abe is dörfli, wo mer uf alte burgmuure ume kragslet sind und ois en guätä zmitag gönnt hend. wiiter dur die wunderprächtig natur isches nach clervaux. es herzigs dorf imene grüänä tal wo sich de fluss clerve dedurschlänglet, d`chile

glogge bimbelet und e grosses alts schloss staht.