Tag 64 bis 66 (31.5.-2.6.21 Meruge/ Carregal do Sal /Sao Joao da Pesqueira/Miranda do Douro)

vo meruge isches den e halbstund wiiter zum negste dorf wo mer ois mit eme hüperaktvie schott troffä händ wo ois sammt kayak an rio mondego gfahre hät. nachere churze instruktion über kayak fahre undeme pländli miteme bestimmte träffpunkt isches denn au scho ab ufs wasser. sisch en riese spass gsi und scho nach de erste paar badelzüüg isch i ois s`böötli-feeling uftaut. so hämer es inseli a gstühret s erste bierli killt und de fisch zuä gluägt wo allpot nach müggli gumpet sind. sind vier mega schöni und spassigi stunde uf em rio mondego gsi. und wills ois so gfalle hät hämmer den au mit em admiral es plätzli am fluss a gstühret zum übernachtä (carregal do sal am rio mondego).

nachem verwache am negste morge hämer na es es momentli paar junge type bim fische zuä gluäget und nacher isches wiiter, da mer ja na chli me is land iiwerts wänd.

in viseu hämer en posti halt gmacht, händ es schemmeli und e bratpfanne brucht und zum zmittag heds den en dürüm gäh. so hämmer chöne wiiter nach castro daire es schöns stedtli wos fliissig am schaffe gsi sind wills en neue dorfplatz git. nach em psuäch binere lustige ufgstellte floristin wo ois es wunderschöns bluämä gsteckt gmacht hät simmer na in friidhof ufe spaziert und händ paar minute bim armando verbracht.

nacheme spazottel durs stedtli hämer den au na bar gfunde wo de marco gern na hät welle es bierli go zwitschere.

oisi fahrt isch a lamego bis mer am rio douro une gsi sind wo ois d`strass na paar kilometer na gfüährt hät. die gägend isch e mega wy gägend und jede hoger und hügel isch vo räbe bepflantz. drum händ mir dänkt mir stelled mal s navi i und suäched de weg zume wiiguät wo plätz zum im auto pfuuset a büütet. uf pflastestei strössli wo nöd viil breiter gsii sind wie de admiral isches den kurve für kurfe und immer steiler de räbberg uf... inene chline dörfli a cho isch den au dii verhängnis voll kurve cho. uf arschglatt abgfahrne pflasterstei und ere stiigig vo öpe 35% isches am admral ime sehr dumme moment chli zviil worde. de charre abgwürt, brämse druckt aber oise alti veteran rutscht und rutscht eifach wiiter hinderschii wos vor de 120° kurvä eifach nur na s`loch ab gaht.... uf dawiisige vom marco bini zum charre us g jukt, ha woner den es momentli rasch still gstande isch paar stei müsse hinder dreder legge und den ab is dorft semmele go en buur suäche. zum guätä glück hets en junge typ gha wo uf em marco sis hupe ufmerksam worde isch und zimi glii eine vom dorf uf bote het wo nöd lang gfacklet hät, de wassertank uf de ladebrug gfühlt het und ois het chöne so mit abschlepp seil zu dere scheisse us bringe.

nach unändlich viil dank a dhälfer (leider nur i wort will zu dere scheiss corona ziit niemert öpis wett trinke geschweige den nöchers mit eim z`tuä ha) hämer dii "normal" strass gnah und sind eifach weg vo det. händ de schreck zersch müsse verdaue und de hosse schiss chli sackelah.

ufeme parkplatz jrgendwo i de nöchi vo sao joao da perqueira hämer ghalte und au d nacht verbracht. gstörrt het das glaub nur so en alte sack wo ois i de nacht mit em schiiwerfer isch go liechtzeichä gäh. am negste morge häts s`all morgentliche kaffi gäh und den simer wiiter. imne chline supermärt hämer ois mit brötli und fleisch i deckt und hend z`morge gmampfed. uf de N222 isches den wiiter über hügel und dur s grüänä, paar käffli hämer hinder ois glah bis mer den in miranda do douro a cho sind. da stömer jez für paar nöcht mal ufeme camping will mer doch na paar wandertripps vor händ...