Tag 52 bis 58 (19.5-25.5.21 Camping Serrao, Aljezur bis Camping Ericeira, Ericeira)

nach de erste nacht ufem camping serrao sind mir den am negste tag mit oisem admiral ab an strand düset. en churze stopp im supermacado chli verpflägig go chrömle das mer zersch na en z`morge händ chöne mampfe. und den ischs in ständige wind usse an strand gange. de marco isch sini surfkünst chli go vertüfe. leider sind d`welle schlag uf schlag cho so das de atlantik nöd so bruchbar gsi isch zum surfe. aber zum bitz tobä uf em noiiä brätt häts glanget. (: da ich mini mittelohreenzündig am uskurriere bin hani mich nöd wücki is chalte nass gwagt und chli relaxt. de tag hämer den miteme chalte superbock am strand usklinge la. zrugg ufem camping hets na paar bierli, chäs, wurst, brot und chli guäti musig gäh, das mer für de negsti tag gstärkt gsi sind. will denn ischs mit oisne offroad skates chli dur d`landschaft gange. sisch en cheibe chrampf mit dene (schissfüdli) skates und ehrlich gseit händ mer ois das bitz spassiger vorgstellt. für d`fitness isches super doch mit gschezte 10kg a jedem fuäss häsch den doch öper ghört fuste wie en siidian...

ha mich aber wie immer wiider beruhigt und so simer aber de berg ufwerts mit de turnschuäh. (:

de negsti tag hät nöd wücki guäti surfbedingige für oisi umgäbig a gäh und so häts en ruhige tag i de hängematte mit buäch, muschelchetteli chnüpfe und eme geile burger zum zmittag gä. am abig simmer den vonere riese schaarr moskitos überfalle worde und so simmer am negste tag übersäht gsi mit riise stich.... (:

da ja leider s`freicampe in portugal siit dem jahr verbote isch und au dementsprächend kontrolliert wird isches chli doof will mer vo eim camping zum negste müänd. das passt ois ehrlich gseit nöd so wücki (voralem mir als rappespalter). naja dem gebed mer ois jez hii und so sind mir vo aljezur wiiter nördlich nach melides. det hämer ois wiider für 2 nächt ufeme campingplatz direkt am meer niiderlah. sisch garnüt schöns gsi abgseh vom strand und de strandbar. sii händs da nöd wücki so gha mit de suuberkeit uf de wc`s und duschene und das isch denn scho eher chli grüsig gsi. surfe isch aber au da nöd a gseit gsi da d`welle direkt bim strand broche sind und so händ mir näbst hockeyluäge ois am strand und i de strandbar verwiilet.

nach dene zwei nächt uf dem schmudelplatz simmer richtig troia ufe gfahre und det hämer d fähre nach setubal überä gnah. bi de warte ziit uf d fähre hät de marco na verzellt das die bucht bekannt seg für delfin. was mir den für e schissfroid gha händ wo bi de überfahrt wücki es paar delfind uftaucht sind, sooo schön. in setubal a cho isches denn zersch mal dur de ganz chuäche dur bis mer den ca. 30 min spöter uf em negste camping a cho sind. nach em fiiebermässe hämer den doch chöne ii-tschägge.

da mer en bärehunger gha händ simer den aber nomal in admiral gstiige und ines resti go shrims und es guäts stuck fleisch go gnüssä.

da mer nöd wücki postet händ was ässe a gaht und mer ja nöd chönd miteme superbock usem chüählschrank in tag starte häts en kaffi gäh und denn hämer oises währli zämäpackt und sind los richtig lisabon. det hämer nämli es ikea agstüret, ja sisch nämli soo das mir e noii matratzä bruchät händ. fix hämer gfunde was mer brucht händ und oisi fahrt isch wiiter richtig queluz (lisabon) det simer de königs-palascht (summerresidänz) go a luägä. nöd schlächti gemächer händ die gha und wahnsinig schöni wandmalereiä sind i all dene rühmlichkeite zum bestunä gsi. de garte isch superschön gsi und hät eich mit all dene alte wasserspiil und unzehlige vo pflanze an en riese grosse botanische garte erinnerät. top, so hämmer au mal wiider öpis für oisi bildig gmacht und mer sind nacheme guätä vinho verde den nachli zum chüchä us. i nordöstlicher richtig simer bis nach ericeira ghöterlet und stönd jez ufem noiiä campingplatz. (suber und günstig, wahnsinn) es isch schön und chli grüän, stönd under piniä bäum und händ es päärli widehüpf chöne beobachte und jez chum ischs dunkel worde funklet sogar glüähwürmli.