Tag 4 (2.4.21 / Cala Bona T.d.M)

nachem z`morgä in sant pere pescador hämer oisäs währli wiider zämä packt und sind e superschöni und kurveriichi küstestrass wiiter tuckerlet. da na osterferiä gsii sind und halb spanie ziit gha het zum go velo fahrä, hämer unzehligi länkstange-goiiferis troffe wo sich eis abgstramplet händ. doch im gägesatz zu de schwiz häts au uf soo chline strössli platz für alli. froh simmer aber doch hämmer kei trofähe i form vo töff fahrer-chöpf a oisem auto mitgnah, denn um kurve sind die meistens uf de gägefahrbahn cho...

(weiss nöd ob das oder mis gefluäche de marco me nerve kostät hät)

anere chüähle felswand, miteme schöne chiisplätzli händ mer de admiral chli ruäbä lah, händ turnschuäh mondiert und sind dur en lianeverahngne korkeiche wald spaziert bis mer i e wunderschöni bucht (cala bona) cho sind. det häts en guätä wii und hörndli vom gas chöcherli gä. d vegetation isch scho voll in früählig stimmig, pflanze blüähet scho zum steinige bode us und s schmöckt u guät nach harz und nadelbodä.

d nacht isch au am strasserand schön gsii nur die hundekacke überall isch nöd so a mächelig, voralem wenns am morge pressiert es büschli zfinde zum bislä... (;