Tag 39 bis 47 (6.5-14.5.21 Carrapateira "Amado surfcamp")

leider isch dii nägste 3täg na nüt gsi mit grüänwasserwälle. s`meer hät zimli gas gä und so händ couches gfunde, dases nöd sinnvoll isch sich go abrackerä i das getöse ohni en erfolg z`ha. so händ mir die täg nachli im wiiswasser verbracht, a de technik gfiilät, eskimorolle güäbt, chli badlet und wenn mer erlich sind hät das sooo viil energii und chraft brucht das mer ois zwei täg ruäh gönnt händ vo dä tägliche 3stund surfunterricht.

am sunntig und mäntig isch s wetter e nöd so guät gsii und shät allpot en platzräge und wulchä gäh. so hämmer oisi turnschuäh packt und sind die gägend da ma go abgwagglä.

sisch härrlich gsi de klippene na z`laufä und zuäluäge wie die riisä wälle a de fellse zerberstet sind. au da isch e superschöni vegetation und mer händ stundelang chöne versteinerige suächä, eidächsli und gekos beobachte und über stock und stei chräsmä.

gäg de früähnig abig isch fascht wie bstellt es chlises beizli uftaucht, wo mer nach zwei chalte super bock oisi büch mit shrimps, steak mit bratherdöpfeli und spiegelei undere chüähle fläsche vinho verde voll gschlage händ. bis mer den abzottlet sind richtig camp sind scho d sterne am himmel gstandä. (:

am negste tag isch nomal chli us schlafe und "chillare" a gseit gsi, am namittag simer uf aljezur düset und händ mal wiider läbesmittel i kauft.

am gliiche abig sind den na zwei jungs vo solothurn im camp i troffe mit ihrne van`s.

so häts vor em choche na e gselligi plapperrundi gä und den isch`s ab is näschtli.

da mer oisä ufenthalt im camp um e wuchä verlängerät händ, häts am ziischtig morge wiider ärnscht gultä. nach em z`morgä ischs an "huus-strand" amado wo aber d`wälle nanig viil besser gsi sind (für ois grüänschnäbel) und so hämer sack und pack zämä packt und sind mit em dean (surfcouch) nach sagres gfahre wo mer an praia do beliche passendi welle gfundä händ zum oisi erste versüäch uf de "richtige" wälle z`mache.

sehr, sehr cool doch isches nomal öpis ganz nois zum lärne und nöd ganz soo isii wies bi all denen surfer immer usgseht.(: wenn den aber wüki schaffsch ufstah und richtig strand usäfätze isches es riese gfühl und für das nimmt mer au all die wäschamschine immer wiider gern in kauf. (: nach so paar stund padlä, beobachte, warte, drähiä und wiider voll gäse padlä das mers uf d`welle schafft isch mer scho zimli gnüdelet und salzwasser lauft der na stunde spöter zu allne gsichtsöffnige us. (:

so isches die nöchstä 3 täg wiiter gangä und s isch vo tag zu tag geiler worde.

sisch en super sport wo ois sicher na de rest vo de reis und für`s wiiterä läbe wird begleite. (:

sisch es sehr cools erläbnis gsi mal i somenä camp abstiggä und chöne surfe z`lernä (aso mal grundstei). s`hät ois beidne mega guät da und zwar am körper, geist und seel will mer so richtig hät müsse chrampfe für richtig geili erfolgserläbnis.

nach em gestrige bar bsuäch mit dä lüüt vom camp, müämer hüt passe mit party-night in lagos. mer gnüssed de letscht abig da und froied ois wiider bis wiitergaht.