Tag 29 bis 32 (26.4-29.4.21 A Rua /Ourense /Ponteverda /O Grove / Vilanova de Arousa /Porto do Son

au de morge hanged d`rägewulche na immer ade berggipfel fescht und sich rächt trüäb, nass und chalt. nach em warme kaffi, wurst und brot gahts den aber wiiter me nordwestlich mit em ziel o grova (a toxa / la toja). dä wäg a monforte de lemos verbi bis ourense hät ois immer wiider starchä räge begleitet so das de admiral scho fascht wiider i voller schönheit glänzt. das mer chli zum chuächä us chömed in ourense hämer es stuck uf de autovia zruggleit bis mer in o carballino wieder uf nationalstrasse wiiter sind.

jrgendwo höchi sacos (n541) hämer imene resti zwei feini burger verspissä und händ frisch gstärkt welle wiiter. doch bim abbüge uf d strass hät de admiral plötzli sau luut tönt. guät; negsti ifahrt gnah und ab uf en chiisplatz. en blick under de chlapf und de schaldämpfer hanget frei. so händ mer d werkzügchischte mal äntli chöne bruchä. nach guätärä halbstund hämer aber au das wiider anebracht und de admiral schnurrlet wiider wie es büsi. (:

iiwand frei isch d`fahrt wiiter gange und mer händ scho bald de atlantik chöne hinder de steinige landschaft erblickä. da mer langsam aber sicher parat wered zum mal chli surf-luft schnappe, hämer richtig o grove uf en zältplatz gstüüret. naja campingplätz hets aso gnuäg, nur hämer müsse merkä das mer au i derä gägend doch na paar wuche z`früäh sind und die all na im winterschlaf stecked.

nach paar telefon isches wiider zrugg übers wasser (natürli uf bruggä) und nach vianova de arousa gangä wo doch na en camping offe gha hät. sisch chli en spezielle ort gsi und mer sind ois eich me vorcho wie imne zigüner-wohnwage dörfli. s`hät aber alles gha womer brucht händ und mer sind die einzige gsi abgseh vo de ganzjährigä bewohner.

de tag druff (27.4.) häts en marsch gä nach cambados es mega schöns stedtli wo mer ois paar feini wii gönnt händ. chamer sich ja nöd entgah la i sonerä wii-gägend. (:

nomal e warmi morge duschi und wiiter gahts richtig porto do son. da stömer jez zwüsched wiise, sanddüne und wälder, de wind pfifft ois um d`ohre und en feine z`nacht mit hockey luägä staht bevor. nacherä schön chüälä nacht hämer turnschuäh mondiert und sind go gägend erkundigä. weiche-feinschmöckende waldbode, riese eukalyptusbäum, es bächli wo pletscheret und inere chline bucht eifach is meer mündet, riese felsbrockä womer mit totä und läbige muschlä überwachse sind und wälle wot ghörsch ruuschä... das isch oise spaziergang gsi und eimal me eifach unheimlich schön.

zrug bim auto werdet mer jez eich parat zum de gross drache stiige la, doch leider isch dä "ständig" wind glaub i de siesta. (:

so händ mir ziit oisi homepage chli uf de noiisti stand bringe, mal es buäch läse und chli sii. viilicht ziet de wind ja wiider uf und mer chönd doch na chli go drachestiige la...

bis bald.....