Tag 22 bis 24 (19.4.-21.4.21 Manzanilla / Ayamonte / Isla Cristina / Encinasola)

au am morge früäh hät ois de gugu schowiider begrüässt mit sim "g`sang". de morgä isch frisch gsi und so hets en warme kaffi vor de heizig im admiral gä. nach dem campingstüähli versorged gsi sind und s`morgä gschäft erlediget, isches miteme ungwüsse aber eich guätä gfühl richtig ayamonte gange. e riese brugg füährt über de rio guadiana wo gränze zu portugal isch. det a cho hät de portugisisch zollbeamti ois zwar fründli empfang, doch nacheme churze schwätz und de erchlärig das nur mit arbetsbewilligung momentan s`iireise nach portugal möglich isch hämer chöne rächts um kehrt mache und zrugg nach spanie.

najaa bitz depremiert simmer natürli scho gsi aber shit happens, cha ja nöd immer alles laufe wie mers gern hetted. (:

ufem negste parkplatz hämmer ois noi orientiert und sind nöd wiit vo ayamonte is nägste stedtli (isla cristina) uf en günstige camping g`fahre. sisch en herzige campingplatz gsi und s hät alles gha wo mer brucht händ, sogar warm wasser zum duschä. sehr a gnehm will er überhaupt nöd überloffe gsi isch mit lüüt und die viile pinie händ ersch blüätestaub vo sich gäh und na kei harz. (:

Stedtli isch au da abgseh vo rächt wenige lüüt eher ruhig gsi, isch scho eher es komischs gfühl wenn mer sust spanie kännt wie alles läbt. nach em erste tag chli sii, wäsche und hockey luägä isches am negste tag defür äntlich mal unter warme (25C) temperature an strand gangä. nach paar partie beachball hämer sogar fascht scho de erst hitzestau gha und händ ois ohni problem is chalte nass gstürzt. chli bädelä und schmüselä, dii einte chli fitness die anderä chli muschlä suäche isch denn doch en echt starchä und chalte wind uf cho. sandgstrahlend und tillt vo de sunne hämer ois am früähe abig zämä grafft und sind na in mercadona (iichaufsladä) tipplät und händ ois en feine z`nacht zämekrömlet.

zwei riiiise rinds steak, riis mit schampion sosä und eme richtig guätä mischmasch salat hämmer weredem (schlächtä) chlotämatsch verspissä. yaaamiiiii ischs ois wiider guät gangä. (:

de start in noiä tag fangt mitere morgeduschi, emene usgwogne z`morge mit kaffi, salami, chnoblisossä und paar feine drüü-minute eili a. bevors wiider heisst alles zämä packä und wiiter gahts. tschau meer, hallo früähligs wiisä und högerigi landschaft! (:

richtig landiiwers gahts nach encinasola. dä wäg gaht nach eme stückli autostrass wiiter uf landwäg, verbii a schaf- und chuäherdäne, a dicke fuuhle sauä wo unter eichä im schatte fuhlänzed, a abglägne burähöf und entlang vo me ruhige fluss wo still vor sich hii flüüst. nach dem mer encinasola erreicht händ simer dur das sehr us gstorbnige dörfli marschiert, paar handwerker, wenigi seele usem dorf, en barboy und unzähligi schwalbe isch so zimli seinzige gsi wo mer det troffä händ. natürli simmer det eis go schnappä und händ ois erkundiget bi dem typ vo de kneipä wies usgseht mit uf portugal iireisä. au er hät ois leider nöd me chöne säge wie das es nur mit arbetsbewilligung gaht und sust nix lauft vor em 1.mai.... natürli hämer das sälber welle teste, will mer doch dänkt händ viilicht gahts über so en chlini zoll i de "bergä" eifacher.

nacheme spaziergang am fluss undeme chline picknick hämer oisi sache zämä packt und sind die paar minute na bis nach barrancos gfahre. polizei häts zwar keini gha aber strassesperrä händ au dä wäg verhinderet für nach portugal....

naja, denn hald wiider rächts um und zrugg richtig encinasola, am dörftli verbii bis mer anen schöne süässwasser tümpel cho sind. da stömer jez für die nacht und luäged was de morgig tag so bringt. viilicht gahts an negste gränzübergang (alle guten dinge sind drei) , viilicht lömer ois aber au nachli vo vo spanie überrasche... da mer im obrste zipfel vo andalusiä a cho sind wür de weste (extremadura) uf ois wartä.... (: