Tag 2 bis 3 (31.3.-1.4.21 / Augst / Sant pere Pescador)

da am morge früäh natürli na kei test ergäbnis cho sind, hämmer de motor gstartet und sind richtig gränze düsät. in augst (BL) hämmer e pausä ii gleit. am marco sin negativ test isch cho aber mine leider nanig... nach mehrere telefon und nafröge hät en flotte typ doch na churz vor de 8ä (a.a.) au mis resultat gschickt. da frankrich aber ab de 7 (a.a) nacht-fahrverbot hät hämmer gezwungener mase na e nacht bi de bebbi`s verbracht.

kein schärz, am 1. april isches den au wücki losgange, beid schüch ufgregt simmer über gränze. weder d schwiizer na dfranzosä häts intressiert und soo simmer mit liechtem ruggewind über d`autobahn brummlet. nach paar stund han mi au mal hinder stüür gsezt, doch das mer gnau d strecki dur lyon usgsuächt ha isch wohl chli voreilig gsi. verchrampfti finger, schweissnassi achslä und nerve gleich null bini froh gsi hät min ägel wiider stür übernah... (:

de admiral häts perfäkt gmacht, mer händ 4mal müsse füren iicherä aber punkt 5vor sibni simmer dur de spanisch zoll gschlüpft. det händ zwar buäbä i de vollmontur gwartet, aber abgseh vo grimmig luägä und durrä winkä isch au das ohni wiiters vo statte gangä.

Mer händ richtig girona zielet, sant pere pescador häts dörfli gheisse womer i nöchi vom meer es plätzli zum pfuuse gfunde händ. die erst meeresbriisä i de nase und e steiluuts froschkonzert i de ohrä, eifach härrlich gsii....

............ yeeeeaaahhhiiiii hola espana ..........