Tag 16 (13.4.21 / Sorbas bis Granada)

kaffi duft liit i de luft und eher frischi temperature zum ufstah. defür zirrpts und pfiiffts scho verussä und au mir chömed langsam i gäng. nachem zähputze gahts wiiter und im negstä kaffi gits en halt, s gliebtä pan con tomate y jambon wird verschpissä und s nöchste ziil wird besprochä. in sorbas sälber wird de tank nomal gfüllt; aso eich überfüllt vom tankwart aber defür het sich tank azeig na nie solang nöd bewegt... (:

d landschaft womer durquäret isch prächtig, mer chömed ois vor wie im wilde westä. riese wiitene, wo sich i verschidne orange- und bruntön zeigt, paar büschli und den wiider olivähein. sisch staubtroche und felse wo vorlangerziit vom wasser gformt worde sind raget übereim hinwäg. nöd überrascht simer zudem gsi womer a decorado mini hollywood verbii cho sind. sisch e na bauti westernstadt wo schiints als kulissä für dementsprächendi film gnuzt wird. (spiel mir das lied vom tod, iniana jones, schuh des manitu,..)

äntlich simmer i de gägend vo de sierra nevada und mer chömed nöd zum stunä us.

förräwälder und schluchtä, felse i allne farbe und eifach e echt krassi vegetation.

e tube wo liecht ztüüf cho isch hät zum glück na chöne abbrämse und ufezie, so simmer nach dem schreck au mal wiider chli zum stuune us cho. (:

an guadix verbi bis granada isch de schönsti abschnitt wo mer bis jez gseh händ. nur bini nöd immer de best navigator und ha ois eimal dur granada dur glozt.... zum glück hät de marco aber nerve us stahl und isch lockerflocker dur das getümmel gfahre bis mer den doch de weg zu la alhambra gfunde händ. (:

da aber au i dere riese alag corona am regierä isch, isch alles zuä oder mit studis gfüährt.

mer händ ois defür entschiidä das mer lieber i d altstadt vo granada gönd und ois mal uf dsuächi nach em ois empfolnä bier mached. (dankä dani)

er hät ois nöd zviil versproche und mer händ s alhambra 1925 richtig gern becho. so hets e beizätuur dur granada gä, sisch e veruckt schöni stadt mit sehr viil scharm und allerlei weltä, überall wo mer ii kehrt sind hämer köstlichkeite vom huus becho. leider chamer au da nöd so guät stuunä will mer sust bestimmt i die cheibe hundescheisse staht wo a mass ume liit. gäg de spöter abig hän mer den beid chli gnuäg gha und da's en steile ufstiig bis zum auto gsie isch, hämer e chlini zwüscheverpflägig ghollt und sind gschezti 10`000 stägetritt dur gässli ufgstige. zum schluss na bergetappä, en sprint gäg velofahrer und dobä a cho es chötzi wills den doch chli z viil gsi isch..... aso de sprint natürli ((;