Tag 136 bis 142 (11.8-17.8.21 Zwevegem / Beauvechain / Solwater)

am 8ii isch tagwach, en kaffi, zähputze und den heist loooosss nach belgie. nach guät 45min sind mer in estaimpuis bi dere american garage a cho. de kontaktmaa het ois den am mech überla und so het de marco mit em das züg a glüäget. mer hend de admiral chöne dete la und sind is negste kaff gwagglet wo mer ois en kaffi und es feins sandwitch gönnt hend. nach nochli umeplemperle sind mer den zrugg. doch de mech het gmeint er hegi nix gfunde am motor, hät den de luftfilder na usepuzt und gmeint es seg eher was am getriibe. naja ehrlich gseit isch das eher scheisse... aber mache chönts doch au nüt und sii hend gmeitn eifach wiiter fahre da er nöd schlächt lauft. naja typisch vorfüähr effekt, will zwei täg vorher händ mer na gmeint er ligg ois ab.... da mer lang ziit gha hend zum ois es plätzli für d `nacht suäche händ mer denkt mer stüüred en buurehof a wo duschene a büütet. de hoff vo 1812 het denn au na es plätzli für ois gha und sisch schön gsi. mer hend ganz en lustige nachber gha wo ois vollgschwafflet hät und au sust müänd mer allso säge das belgier es super lustigs volk sind was mer bis jez so troffe hend a lüüt.

am erste namiitag/abig sind mer denn scho am bier verfallä. (: de hof het e grossi hofbeiz gha, womer hät chöne sehr guäts bier trinke und feinei hofeigeni beefburger ässe. da simmer natüri grad richtig gsi. naja a dem abig sind mer den na under duschi gschwanked und z`fride is bett kräsmet. am negste tag händ mer flott us gschlafä und eifach mal wiider d`sunne gnossä, g`läse und chli gsi.

wiiter isch oisi reis nach beauvechain uf es schöns naturcampingplätzli, wo`s viil eseli und gäns gha hät. härrlich da d`sunne wiider mag schiine, so händ mer ois iigrichtet und sind chli a d`sunne use ghockt. hend feins chalts stella gnosse und bis am abig spaht pokeret. z`wüsched durre sind mer den rasch zum italiener übere go pizzas holle und so hend mer eimal me en sau friidliche und schöne abig zämä gnossä.

am negste morge hets nachem z`morge gheisse rucksack packe und turnschuäh mondierä. mer hend welle das bekannte stedtli mille go a luäge, so sind mer voller elan 12km det hii gstifflet. leider sind mer aber bitz entosche gsi, will abgseh vomene chline dorfbeizli undere alte chille miteme riese durenand vo alte grabstei hets eich nöd viil me gha. naja s`hät den doch öpis zwüsched zäh gäh und en aperol spritz bevor mer wiider die 12km hei marschiert sind. d sunne hät möge schiine und das isch eich d`hauptsach gsi. (:

oises fährtli isch wiider nordöstlich, verbi dur schöni dörfli über höger und dur grüäni täler, dur d`stadt huy entlang a de maas und scho fascht a dii dütsch gränze. det simmer im gebiet vo hohes venn in solwaster uf es parkplätzli im wald gfahre. sisch traumhaft gsi will de ganzi wald usgseht wie e grossi elfe und feeä landschaft, verwachse mit moos und guät schmöckendem wald bode. doch au da gseht mer überall d`spurä wo de räge und das viile hochwasser hinderla hät. mer sind chli dur de wald gschlenderet hend ois es schöns plätzli gsuächt und det händ mer den würst grilliert und händ chöne es eichhörndli beobachtä. am morge druff händ mer druckseck mit picknick glade, sind ab i d wanderschuäh und händ en riese spaziergang dur die schöne wälder und d`moorlandschaft gmacht. uf mitti wäg isch zügige wind und starche räge uf cho und so sind mir pischt nass bis uf d`underhosä am spötere namittag zrugg zum admiral cho wo mer denn sit langem wiider mal vor d`heizig ghockt sind und ois ufgwärmt händ. sisch sehrsehr schön gsi und mer hend ois fascht nöd chöne satt luägä a dene verschiidene grüänä moosteppich, pilz, bluämä und em reh. eifach hammer gsi und mer froiied ois scho uf dii negst wander tuur wo mer mached.

nachere chalte nacht und knappe 12 grad am morge isches den ca. e halbstund chli südwestlicher gange. in coo (nöchi stavelot) sind mer uf es chlises campingplätzli am fluss gfahre. au da hends schwers unwetter gah und es ligged na überall sandseck und schutt umenand wo die wassermängene mit sich treit händ. morn gahts den mal wiider in es stedtli, go gügxle obs ächt öpis z`pöstelä oder z`bestunä git. (: