Tag 12 bis 14 (9.4-11.4.21 Gandia / La Marina Alicante bis Cuatro Calas Murcia)

wie abgmacht mit de caravan werkstatt händ sii oises gwünschte teili für de chüählschrank bstellt und mer händs chöne abhollä. übernachtet hämmer nöd wiit entfährnt binere fruchtsaft firma ufeme grosse parkplatz. garnüt schöns wills glaub d mülldeponii vom ganze kaff gsi isch. egal zum schlafe häts det völlig glanget....

nachem teili abholle undeme grosse läbesmittel ii chauf isches wiiter richtig alicante.

det hämmer ois es campinresort usgsuächt. im stettli la marina simmer den zwei nächt blibä und händ dii erst wösch gmacht und duschät für dii nägste paar täg. (:

temperature sind schön a gnähm gsi und shät i de nacht es früähligsgwitter mit räge ge.

oises vordach hät allso d hauptprob bestandä. da de campingplatz scho rächt voll gsi isch und überall rauchverbot hämmer ois gmüätli ii grichtet und sangria gnossä, garschlöchlet, chillt und mit em füdli chli flüüge gfangä.

soo sind die täg ufem camping au zimli zügig verbii, am dritte tag hämmer nacheme feine rüährei mit späck und tomate oisi siibä sache wiider zäme packt und sind wiiter richtig süde tuckerlät. de duft vo de orangeblüäte isch härrlich und hät ois bis as nöchste örtli begleitet. in aguilas (murcia) hämer en abzwiiger zumene strandparkplatz gnah, wo scho dii erst schlange vor ois über dä wäg gschlänglet isch...

sisch e mega hitz gsi und richtig schön häts so gwindet am strand, so hämmer ois de ersti bränner ghollt. (: d lüüt da händ ganz und garkei froid a de camper und näbst mürische blick häts sogar na en mittelfinger gä zum abschiid. naja gschlafe hämer wäg dem glich guät. (: